|
Janch agujk jotkujk ëëts nayjaw
ku yää napyääjtyë’m nay’ixyë’m
jets ja’ ää ayuujk nyäjkë’n
nakyo’oyë’n naknäjxë’n.
Mayjëëjp kukäjp ää ayuujk
tëgachety yää nyamyëkyët
mëde’p kukäjp jä’äy kyäjpxtëp
në’n yë’nëwenpë’t pyujx kyäjp tmëëd.
Nyëja’wëp ayuujk nëdu’uk nëdu’uk
xë’n juujky’äjtën yo’oy, xë’n
Et naxwiiñ mëëd kyäjpxt myatyä’kt.
Tëë e’pxmäjk jëmëjt nyäjxn,
ku kukäjp jä’äy jaapy ke’etsp
nyakyajpxyët nyamyëkët ojts
jëts ayuujk ojts tkëxjaaty nekyëxp
kyë’m ayuujkëxp jëts amaxänkëxp.
Ku y’ääts kyojkp tjëntsë’guët
jëts ku pyujx kyäjp tjamyatst,
jabety ojts junktë’ëy jyä’ät
pety tëjk jotp Palacio de Bellas Artes
mää ää ayuujk tsuj öyby yak’agäpxpaky,
kajaa ojts öy yakjaw ku naktunkpääjtyë’m
adom n’ää ayuujk, ku yak jä’äy yak’ëky.
Öy ku yää ijky napyääjtë’n nay’ëjxë’n
yää mää ää ayuujk naktu’unë’n
jëts xyëmu’mt, nyasyonë’t nyas’äätsë’t
jëts u’u’ng anä’äjk t’atsokpëktë’t
jëts kyukäjp ayuujk daktu’ndë’t
tjä’tyë’t tnë’ptë’t kojtë’t.
Yää ment, näxt, ejxt may ayuujk
tëgachety, xë’n nëdu’uk nëdu’uk tjaaty.
“Jëts jyënpëtsë’mt adom ja’ n’ää n’ayuujk”
Rosario Patricio Martínez
Tnëgojpk’äjtp chäm
|
